Քննաշրջանի մեկնարկ

Վարդենիսի ավագ դպրոցում մեկնարկել է 2017-2018 ուսումնական տարվա քննաշրջանը: Դպրոցի սաներին և պետական ավարտական քննությունների բոլոր մասնակիցներին մաղթում ենք քննությունների բարեհաջող ընթացք, գիտելիքների ճիշտ օգտագործում:

Բարի երթ սիրելի շրջանավարտներ

Սիրելի շրջանավարտներ այսօր ձեր կյանքում հիշարժան օր է, դուք հրաժեշտ եք տալիս հարազատ կրթօջախին, սիրելի ուսուցիչներին և դասընկերներին: Տարիներ շարունակ դպրոցը ձեզ համար եղել է կրթման, դաստիարակման և արժեքների ձևավորման յուրատեսակ դարբնոց: Ուսումնառության այս տարիների ընթացքում դուք շրջապատված եք եղել մանկավարժների ջերմությամբ, ընկերների մաքուր և անաղարտ հարաբերություններով, ձեզ սովորեցրել են լինել ազնիվ, բանիմաց, երկրին ու հայրենիքին նվիրված քաղաքացիներ:

Ձեզ ամենայն բարիք ու հաջողություններ,թող իրականություն դառնան ձեր և ձեր ծնողների երազանքները:

Բարի երթ

Եվս մեկ հաջողություն

Վարդենիսի ավագ դպրոցի աշակերտուհի Արփինե Սահակյանը  մասնակցեց Արվեստի միջազգային 11-րդ մրցույթ փառատոնին և ՙՙԴասական և էստրադային երգեցողություն մինուսային հնչյունագրով՚՚ անվանակարգում արժանացել է  երրորդ կարգի մեդալի: Դպրոցի ողջ անձնակազմը շնորհավորում է Արփինե Սահակյանին և նորանոր հաջողություններ բարեմաղթում:

Հաջողություն. 3-րդ կարգի դիպլոմ առարկայական օլիմպիադայից

Վարդենիսի ավագ դպրոցի 9-րդ դասարանի աշակերտ Արթուր Բաղդասարյանը հայ գրականություն առարկայից մասնակցել էր հանրապետական օլիմպիադային և վերադարձել էր 3-րդ կարգի դիպլոմով: Տնօրեն Ո.Ոսկանյանը, ուսուցչական և աշակերտական անձնակազմը շնորհավորեցին Արթուրին և ավելի մեծ բարձրունքներ մաղթեցին: 

Վազգեն Սարգսյան

Հայաստանի առաջին Հանրապետության հիմնադիրներ

Մայիսյան հերոսամարտերի 100ամյակին նվիրված միջոցառումներից  հերթականը Վարդենիսի Հ.Համբարձումյանի անվան ավագ դպրոցում  տեղի ունեցավ վերջերս:

<<Հայաստանի առաջին Հանրապետության հիմնադիրներ>> խորագիրը կրող  բաց-դաս միջոցառումը կազմակերպել էր դպրոցի մանկավարժական և աշակերտական անձնակազմի կողմից հարգված ուսուցիչներից  Բելլա Սարգսյանը:

X դասարանի աշակերտները հանգամանալից ներկայացրեցին  1918թ. դաշնակցական  գործիչներ Հ.Քաջազնունու, Ալ.Խատիսյանի, Հ.Օհանջանյանի, Ս.Վրացյանի և Ա.Մանուկյանի  կյանքի  կարևորագույն փաստերն ու  գործունեությունը:

Միջոցառումն անցավ մտքերի փոխանակության, հարցադրումների և փաստերի քննարկման աշխույժ մթնոլորտում:

Ներկաները գովասանքի խոսքեր ասացին պատմության ուսուցչուհի Բելլա Սարգսյանին` կատարած աշխատանքի համար:

Սարդարապատը՝ հայոց պետականության ծնունդ

Մայիսյան հերոսամարտերի 100-ամյակին ընդառաջ Վարդենիսի Հ. Համբարձումյանի անվան ավագ դպրոցում տեղի ունեցավ բաց դաս-միջոցառում՝ ՛՛Սարդարապատը՝ հայոց պետականության ծնունդ՛՛ վերնագրով; Դասը կազմակերպվել ՝էր 11-րդ բ հումանիտար դասարանում՝ պատմության և հասարակագիտության շնորհալի ուսուցչուհի Լորետա Կոլոտյանի կողմից; Դասը հագեցած էր հայրենասիրական հզոր շնչով, որը արագ վարակեց բոլոր ներկաներին; Ավարայրից Սարդարապատ, Սարդարապատից Արցախ հայոց սուրն անվրեպ գործեց…Դասը հագեցած էր պատմական հարուստ փաստարկներով և վավերագրական նյութերով, իսկ հայրենասիրական երգերը պատմական նյութի իսկական ավարտն էին; Ղարաքիլիսայի հերոսամարտի վերաբերյալ կովկասյան ճակատի թուրքական ռազմաճակատի հրամանատար Վեհիբ փաշայի վկայությունները ամբողջացրին ներկաների տպավորությունները:

Հայ մեծերը

Սփյուռքի նախարարության կողմից նախաձեռնած  «Հայ մեծերը» միջոցառումների շրջանակում Վարդենիսի Հ.Համբարձումյանի անվան ավագ դպրոցի XI դասարանցիները՝ դպրոցի հայոց լեզվի և գրականության մեթոդ միավորման նախագահ, հմուտ մասնագետ, բարձր արժեքների տեր անձնավորություն Էսմա Վասիլյանի գլխավորությամբ, անցկացրեցին բաց դաս-միջոցառում՝ նվիրված մեծ դերասան Վահրամ Փափազյանին և գրող, հրապարակախոս Զապել Եսայանին:

Միջոցառումն անցավ բարձր մակարդակով:

Հին Նոր Տարին Վարդենիսի ավագ դպրոցում

Վարդենիսի ավագ դպրոցի անձնակազմը մեծ ուրախությամբ տոնեց հին Նոր Տարին: Բոլորիս մաղթում եմ այս Նոր Տարում արժանապատիվ աշխատավարձ, բարձր տրամադրություն, անսպառ եռանդ  աշխատանքը ճիշտ և որակով կազմակերպելու համար:

Շնորհավոր Ամանոր և Սուրբ Ծնունդ

Նախատոնական բարձր տրամադրությունը, ջերմ ու հաճելի մթնոլորտը, անսպասելի անակնկալները թևածում էին Վարդենիսի Հ.Համբարձումյանի անվան ավագ  դպրոցում:
Շնորհաշատ աշակերտների  շնորհիվ օրը դարձավ անկրկնելի և անմոռանալի:
Պարը իր ողջ հմայքով և տաքությամբ ներխուժել էր բոլորի սրտերը:
Գեղեցիկ, հրաշք օրվա համար շնորհակալ ենք դպրոցի  ուսումնական գծով փոխտնօրեմ Մայա Ոսկանյանին: Շնորհակալություն նաև  դպրոցի անձնակազմին, ծնողական խորհրդին և մեր շնորհալի, տաղանդավոր սաներին:

Այս նոր տարին աշխարհին, խաղաղություն թող բերի,
Ջահելներին այս տարին թող սեր ու խինդ պարգևի,
Բալիկներին զվարթուն՝անհոգ մանկություն բերի,
Տարեցներին՝ ապահով, առողջ օրեր նվիրի։
Թող հայի օջախներում մանկան մաքրություն լինի,
Լքված, դատարկ տներին կենդանության շունչ բերի,
Երկրից հեռացածներին՝վերադարձի հույս բերի,
Անտուն մնացածներին ՝տաքուկ տանիք թող բերի,
Իզուր նեղացածների հոգուն հաշտություն բերի,
Կորուստ ունեցածների ցավը փոքր ինչ դարմանի։
Թող մեկը մեկին ների,մի քիչ հանդուրժող լինի,
Թող ագահ մարդու աչքը հող-նշխարքով կշտացնի։
Թող միշտ բարի լույս լինի, վաղվա օրվա հույս լինի,
Եկեղեցու խորանում պսակ ու կնունք լինի,
Թող խաղողի օրհնություն ու լավաշի տոն լինի
Եվ ազգային զարթոնքի փառաբանման ձոն լինի։
Քաջակորով զինվորիս Աստծո աջը պահպանի,
Աստվածատուր ժողովրդիս փրկության աստղը փայլի,
Արարատի գագաթին երկնի կանթեղը վառվի
Ու սրբազան հայոց հողում խաղաղություն հաստատվի։

Շնորհավո′ր Նոր տարի։

Մոնթե Մելքոնյան 60

2017թվականի դեկտեմբերի 8-ը Վարդենիսի Հ.Համբարձումյանի անվան ավագ դպրոցում եռուզեռ էր: Աշակերտական խորհուրդը, աշակերտական խորհրդի նախագահ Արփինե Սահակյանի ակտիվ մասնակցությամբ, դպրոցի ուսումնական գծով փոխտնօրեն Մայա Ոսկանյանի ջերմեռանդության և նպատակասլացության  արդյունքում կազմակերպել էին մեծ ու հետաքրքիր միջոցառում նվիրված արցախյան պատերազմի ակտիվ մասնակից, հայազգի հրամանատար, Հայաստանի և Արցախի հանրապետությունների ազգային հերոս Մոնթե Մելքոնյանի /Ավո/ 60 ամյակին:

Միջոցառման ընթացքում  վերհիշեցին Ավոյի անցած  ուղին, որի ընթացքում  նա պայքարել է  հայերի իրավունքների,  հայոց ցեղասպանության ճանաչման և մեր  հայրենիքի վերատիրման համար:

Արփինե Սահակյանը  հրաշալի կատարեց  Մոնթեի հիշատակին նվիրված երգեր:

Դպրոցի պարային խումբը ռազմահայրենասիրական պար ներկայացրեց:

Միջոցառման ավարտին գովեստի, շնորհակալական  խոսքեր ասացին դպրոցի  տնօրեն պարոն Ոսկանյանը, հայոց լեզվի և գրականության առարկայական մեթոդ միավորման նախագահ տիկին Վասիլյանը:

Եվս մեկ հաջողություն…

Ս/թ նոյեմբերի 25-ին Վարդենիսի ավագ դպրոցի <<Օզոն>> թիմը, դպրոցի ուսումնական գծով փոխտնօրեն Մայա Ոսկանյանի  և քիմիայի ուսուցչուհի Սիրան Ստեփանյանի գլխավորությամբ, Ժորա Պետրոսյանի, Արկադի Պետրոսյանի, Հասմիկ Գապոյանի և Արթուր Բաղդասարյանի մասնակցությամբ մասնակցեցին <<Այբ>> կրթական հիմնադրամի կողմից կազմակերպած պատանի քիմիկոսների համահայկական 8-րդ  մրցաշարի քառորդ եզրափակիչ փուլին` ցուցաբերելով լավ արդյունք:

Բանակի օրվան ընդառաջ

2017թվականի նոյեմբերի 17-ին Վարդենիսի Հ. Համբարձումյանի անվան ավագ դպրոցում տեղի ունեցավ միջոցառում «Բանակի օրվան ընդառաջ» խորագրով:

Միջոցառումը կազմակերպել էր դպրոցի զինղեկ, կոչումով մայոր, Արմեն Պետրոսյանը: Մի անձ, ով սիրված և հարգված է թե´ ուսուցչական և թե´ աշակերտական կոլեկտիվների կողմից:

Միջոցառման ընթացքում հնչեցին բանակին ուղղված ստեղծագործություններ, ռազմահայրենասիրական երգեր, կատարեցին ռազմական պարեր:

Միջոցառմանը ներկա էին դպրոցի կոլեկտիվը, ներկայացուցիչներ աշակերտական և ծնողական կոլեկտիվներից, ինչպես նաև 59016 զորամասի և Վարդենիսի զինկոմիսարիատի սպաները:

Միջոցառման ավարտին շնորհակալական, շնորհավորանքի և ոգևորման խոսքեր ասացին.

դպրոցի տնօրեն պարոն Ոսկանյանը, Սոթքի զորամասի ներկայացուցիչ Լ.Մանուկյանը և հայոց լեզվի ու գրականության մեթոդ միավորման նախագահ տիկին Վասիլյանը:

Այսօր Վարդենիսի ավագ դպրոցի 11-12-րդ դասարանցիների հանդիմում ունեցան Ֆինանսական համակարգի հաշտարար գրասենյակի ներկայացուցիչների հետ: Ակտիվորեն մասնակցեցին քննարկումներին և ավելացրեցին իրենց գիտելիքները վճարային քարտերի, ավանդների և վարկերի վերաբերյալ:

Բաց դաս Վարդենիսի ավագ դպրոցում

Ս/թ սեպտեմբերի 25-ին Վարդենիսի Հ.Համբարձումյանի անվան ավագ դպրոցի հայոց լեզվի և գրականության ուսուցչուհի Քնարիկ Սաղաթելյանը բաց դաս անցկացրեց 9-րդ դասարանցիների մասնակցությամբ  <<դերբայական դարձված>> թեմայով: